पंचक प्रपंच

पंचक प्रपंच १९४४ सालमा प्रकाशित कृति हो । यो पुस्तक १९४३ साल कार्तिक महिनामा लेखिएको उल्लेख मोतीरामले नै उक्त कृति (श्लोक २७) मा गरेका छन् । मोतीरामको १९४४ साल अगाडि छापिएको अरू कुनै पुस्तक पाएइको छैन । गोपीनाथ लोहनीले यिनको वर्णन गर्दा यही ग्रन्थ पहिलो हो भन्ने उल्लेख गरेका छन् (मोतीरामको जीवनी पृ. ७७) । हुन त नरदेव पाण्डे र लक्ष्मीदत्त पन्तले गजेन्द्र मोक्षलाई पहिलो मानेका छन् (ऐ.पृ. १६, ७४) तर गजेन्द्र मोक्षको पहिलो प्रकाशन मितिको पत्तो नभएकाले र १९४८ मा प्रकाशित दोस्रो संस्करणमात्र फेला परेकाले पंचक प्रपंचलाई मोतीरामको पहिलो प्रकाशित कृति मानी यसैलाई यस ग्रन्थावलीमा अगाडि पारिएको छ । यस कृतिमा जूवाको खराबी देखाउने २७ श्लोक पंचक प्रपंच र १३ श्लोक तीजको कथा सासु बुहारीको झगरा समावेश भएको छ । पंचक प्रपंचमा यसरी दुइ लामा छोटा कविताको संकलन भएकाले यस कृतिलाई मोतीरामका दुइ कविताको संग्रह पनि भन्न सकिन्छ । उक्त कृतिको पुनः प्रकाशन सं. २०३८ मा प्रजेन्द्र प्रकाशनबाट भएको छ । –रमा शर्मा

Author

मोतीराम भट्ट

Language

Nepali

Publisher

राष्ट्रिय युवा सेवा कोष (मोती ग्रन्थावली)

Edition

प्रथम, २०४५

Source

Sahityaras.com

Licence

Used with permission of Sahityaras.com